Vinícius Júnior oo halis ugu jira inuu seego El Clásico kadib casaankii xalay.
Xiddiga Real Madrid, Vinícius Júnior, ayaa wajahaya suurtagalnimada ganaax laba ilaa saddex kulan ah kadib markii uu kaarka cas qaatay kulankii xalay, taas oo halis gelin karta ka qaybgalka kulanka weyn ee El Clásico oo la qorsheeyay 26-ka bishan.
Vinícius Júnior, oo garabka uga ciyaara Real Madrid, ayaa xalay dhaliyay gool qurux badan, balse faragelinta aaladda garsoorka muuqaalka ee VAR ayaa keentay in goolka la diido.Go’aankaas ayaa si weyn uga careysiiyay xiddiga reer Brazil, kaas oo markii dambe timaha jiiday mid ka mid ah ciyaartoyda Villarreal, falkaas oo sababay in garsooruhu tuso kaarka cas.
Casaanka kadib, Vinícius ayaa sii muujiyay caro, isaga oo si kulul uga falceliyay go’aanka garsooraha. Ciyaartoyda ay isku kooxda yihiin ayaa hareereeyay si ay xaaladda u dejiyaan ugana hortagaan in muranku sii xoogeysto.
Warbixinta garsooraha ee ciyaarta kadib ayaa muujisay in Vinícius uu sii waday mudaaharaadka xitaa markii la tusay kaarka cas, isaga oo diiddanaa go’aanka la gaaray.
Garsooraha ayaa warbixintiisa ku sheegay:
“Kaarka cas kadib, wuxuu sii waday mudaaharaadka isaga oo diiddan go’aankayga, si xooggan iiguna qaylinayay. Sidoo kale, wuxuu muujiyay caro weyn.”
Hadalladaas ayaa muhiim u noqon kara qiimeynta tallaabada anshaxeed ee laga qaadi karo ciyaaryahanka, iyadoo go’aanka kama dambaysta ah uu ku xirnaan doono guddiga anshaxa ee tartanka.
Wararka soo baxaya ayaa tilmaamaya in Vinícius Júnior uu wajihi karo ganaax laba ilaa saddex kulan ah. Haddii ganaaxaasi dhaqan galo, xiddiga reer Brazil wuxuu seegi karaa El Clásico, oo Real Madrid iyo Barcelona ku ballansan yihiin 26-ka bishan.
Real Madrid ayaa hadda wajahaysa walaac ku saabsan maqnaanshaha mid ka mid ah xiddigaheeda ugu muhiimsan, xilli ay isku diyaarinayso kulanka ay sida weyn u sugayaan taageerayaasha kubadda cagta. Si kastaba ha ahaatee, weli waxaa muhiim ah in la sugo go’aanka rasmiga ah ee ganaaxa ka hor inta aan la xaqiijin in Vinícius uu seegi doono El Clásico.
