Dockers Derby: Derby-ga ugu rabshadda iyo xiisha badan London oo dib u soo laabtay 14 sanno kadib.
Galabta, London waxay mar kale markhaati ka noqonaysaa mid ka mid ah xifaaltannada ugu kulul uguna taariikhda dheer kubadda cagta Ingiriiska.
West Ham United iyo Millwall ayaa garoonka The Den isku wajahaya, iyagoo dib u soo noolaynaya Dockers Derby markii ugu horreysay muddo 14 sano ah—kulan aan ku koobnayn 90 daqiiqo oo ciyaar ah, balse xambaarsan taariikh, sharaf iyo xamaasad jiilal soo taxnayd.
Kulankan, oo ka tirsan wareegga 8-aad ee horyaalka Championship-ka, ayaa waxa lagu hardamayaa dagaal sumcadeed iyo mid maamuus oo dhex mara laba kooxood oo deris ah, balse muddo dheer ku loollamayay qalbiyada iyo taageerada dadka London.
Indhaha kubadda cagta magaalada ayaa galabta ku wada jeeda garoonka The Den, halka taageerayaasha labada dhinac ay diyaar u yihiin inay abuuraan jawi kulul, cod dheer iyo xamaasad gaaxsaneyd muddo ku dhaw 15 sano.
Dockers Derby waa magaca loo yaqaan kulanka u dhexeeya labada kooxood ee ka dhisan koonfur-bari London, West Ham United iyo Millwall. Labada kooxood ayaa muddo dheer lahaa xifaaltan soo jireen ah, iyadoo kulamadooda lagu yaqaanay tartan adag iyo xiiso gaar ah oo ay muujiyaan taageerayaasha labada dhinac.
Kulanka maanta ayaa noqonaya markii 100-aad ee ay labada kooxood si rasmi ah isaga hor yimaadaan. Millwall ayaa leh tirada guulaha ugu badan, iyadoo badisay 38 kulan, halka West Ham ay guuleysatay 34 jeer. 27 kulan ayaa ku dhammaaday barbaro.
Labada kooxood ayaa markii ugu dambeysay wada ciyaaray sanadkii 2012, taasoo ka dhigaysa kulanka maanta mid si weyn loo sugayay.
Maadaama Dockers Derby uu caan ku yahay xifaaltanka taageerayaasha iyo dhacdooyin rabshado wata oo mararka qaar hareeya kulamada, waxaa la diyaariyey qorshe amni oo ballaaran.
In ka badan 400 oo saraakiil boolis ah ayaa loo qorsheeyay sugidda ammaanka kulanka, taasoo lagu sheegay inay qiyaastii afar jibaar ka badan tahay tirada saraakiisha caadi ahaan loo qoondeeyo kulamada Championship-ka.
Tallaabooyinkan ayaa looga gol leeyahay in lagu xaqiijiyo amniga taageerayaasha, ciyaartoyda iyo shaqaalaha garoonka, iyadoo si gaar ah isha loogu hayo dhaq-dhaqaaqa taageerayaasha labada kooxood.
Soo laabashada Dockers Derby kadib 14 sano ayaa dib u soo noolaynaysa mid ka mid ah xifaaltannada ugu caansan kubadda cagta London. Taariikhda dheer ee labada kooxood, tirada badan ee kulamadooda iyo xamaasadda taageerayaasha ayaa kulanka maanta ka dhigaya mid si weyn loo wada sugayo.
Marka ay West Ham iyo Millwall garoonka isku wajahaan, ma aha oo keliya saddex dhibcood oo la isku hayo; waa kulan ay ku kulmayaan taariikh, xifaaltan iyo sharaf derisnimo, taasoo ka dhigaysa Dockers Derby mid ka mid ah kulamada sida gaarka ah indhaha loogu hayo London.
