Wixii ka dhacay Madrid Derby kadib Real Madrid oo arrin la yaab leh ka dalbatay FIFA iyo Xiriirka LaLiga
Real Madrid ayaa qaaday tallaabo adag kadib dhacdooyinkii ka dhashay Madrid Derby-ga, iyadoo kooxda Los Blancos ay si weyn uga cabatay go’aamadii garsoorka kulankii ay 2–1 kaga adkaatay Atlético Madrid 20-kii Sebtembar. Real Madrid ayaa si gaar ah su’aal uga keentay qaar ka mid ah go’aamadii garsoore Miguel Ángel Ortiz Arias iyo VAR.
Muranka ayaa sii xoogaystay kadib markii Javier Tebas, madaxweynaha LaLiga, uu ka hadlay cabashooyinka Real Madrid, isagoo sheegay in sheegashada ah in garsoorayaasha lagu hago inay kooxda ka hor yimaadaan ay tahay wax aan xaqiiqo ku dhisnayn. Hadalladaas ayaa si adag uga careysiiyay Real Madrid, taasoo u aragtay inay ka hor imaanayaan dhexdhexaadnimada laga filayo madaxa LaLiga.
Real Madrid ayaa 22-kii Sebtembar soo saartay bayaan rasmi ah oo ay ku sheegtay in hadallada Tebas ay yihiin kuwo aan la aqbali karin, waxayna dalbatay in LaLiga loo helo hoggaan cusub oo si dhexdhexaad ah u maamula tartanka. Kooxdu waxay sidoo kale sheegtay in madaxweynaha LaLiga uu masuul ka yahay inuu ilaaliyo danaha dhammaan kooxaha, isla markaana uu ka fogaado weerarro joogto ah oo loo arko inay ku wajahan yihiin Real Madrid.
Tallaabadan ayaa dib u soo noolaysay khilaafkii muddada dheer u dhexeeyay Real Madrid iyo Tebas, iyadoo labada dhinac horey ugu kala aragti duwanaayeen arrimo la xiriira maamulka iyo xuquuqda kooxaha LaLiga. Sidaas darteed, wixii ka dhashay Madrid Derby-ga ayaa isu beddelay muran ka baxsan garoonka, waxaana hadda si weyn loo hadal hayaa mustaqbalka xiriirka Real Madrid iyo hoggaanka LaLiga.
