Mourinho oo shaaciyay sida Real Madrid dib ugu soo celisay

José Mourinho ayaa ka hadlay sirtii ka dambeysay dib ugu soo laabashadiisa Real Madrid, isagoo sheegay in kooxda reer Spain ay iyadu la soo xiriirtay dhammaadkii xilli-ciyaareedkii hore, kadib laba xilli oo natiijooyinku aysan noqon sidii laga filayay.

Mourinho ayaa sheegay in Real Madrid ay fariin cad u dirtay, iyadoo ku xusuusisay xiriirkii hore ee ka dhexeeyay labada dhinac. “Waan ku naqaannaa, adiguna waad na taqaan. Waxaad taqaan kooxda, dhaqankeeda iyo dadka halkan jooga, annaguna waan naqaan sida aad u shaqeyso,” ayuu sheegay Mourinho isagoo ka sheekeynaya hadalkii kooxda.

Tababaraha reer Portugal ayaa intaas ku daray in Real Madrid ay si gaar ah uga dalbatay inuu kooxda dib u dhiso. Sida uu Mourinho sheegay, kooxda ayaa u sheegtay: “Waxaan rabnaa inaad dib u dhisto kooxda. Waan kuu baahan nahay. Waxaan rabnaa inaad bilowdo toban sano oo kale oo cajiib ah, waxaana u baahanahay qof leh astaantaada.

”Mourinho wuxuu sidoo kale xusay in markii uu Real Madrid ka tagay 2013 aysan xiriirkoodu gebi ahaanba go’in. Wuxuu sheegay inuu xiriir wanaagsan la sii hayay kooxda, madaxweynaha iyo maamulka, taasoo fududeysay in markii dambe dib loogu laabto Bernabéu.

Inkasta oo uu sheegay inuu ku faraxsanaa Benfica iyo noloshiisa Portugal, Mourinho wuxuu qiray in fursadda Real Madrid ay ahayd mid uusan si fudud uga soo jeesan karin. “Real Madrid waa Real Madrid,” ayuu yiri Mourinho, isagoo muujiyay inuu aad ugu faraxsan yahay dib ugu soo laabashadiisa kooxda iyo inuu haysto dhiirrigelin weyn oo uu ku shaqeeyo.