Ronaldo oo isaga tegay xerada tababbarka ee Portugal kadib khilaaf xooggan oo dhex maray isaga iyo tababbare Jorge Jesus

Xiddiga Portugal ayaa ka carooday go’aanka tababbare Jorge Jesus, kadib markii loo sheegay inuu markale kursiga keydka ku bilaabanayo kulanka Denmark.

Cristiano Ronaldo ayaa isaga baxay xerada tababarka xulka Portugal, kadib markii uu khilaaf xooggan dhex maray isaga iyo tababaraha xulka, Jorge Jesus, xilli uu xulkaasi isu diyaarinayo kulanka caawa ay la ciyaarayo dhiggiisa Denmark.

Ronaldo ayaa ka xumaaday tababbare Jorge Jesus kadib markii uu 90-ka daqiiqo kursiga keydka ku qaatay kulankii Portugal ay la ciyaartay Norway. Tababaraha ayaa sidoo kale Ronaldo u sheegay inuu markale keydka ku bilaaban doono kulanka Denmark, arrintaas oo la sheegay inay caro weyn ka dhalisay xiddiga reer Portugal.

Kadib wadahadallo dhex maray Ronaldo iyo madaxweynaha xiriirka kubadda cagta Portugal, iyo kulan kale oo uu la yeeshay Jorge Jesus, Ronaldo ayaa ugu dambayn go’aansaday inuu isaga tago xerada tababarka xulka oo uu dib ugu laabto hoygiisa.

Ronaldo ayaa sheegay in uusan weli faahfaahin ka bixin doonin sababta dhabta ah ee uu uga baxay xerada xulka, balse uu dadka reer Portugal la wadaagi doono marka uu waqtiga ku habboon yahay.

“Kadib wadahadallo na dhex maray aniga iyo madaxweynaha xiriirka, iyo kuwo kale oo dhex maray aniga iyo tababaraha xulka, Jorge Jesus, waxaan go’aansaday inaan isaga tago xerada tababarka ee xulka. Waqtiga ku habboon ayaan dadka reer Portugal la wadaagi doonaa sababta ka dambeysa go’aankayga ah in aan isaga tago xul aan wax walba u huray. Nasiib wacan ayaan u rajaynayaa saaxiibbaday iyo xulkayga Portugal.”

Jorge Jesus ayaa isaguna si cad u sheegay in Ronaldo uusan ka sarreyn ciyaartoyda kale ee xulka, isaga oo xusay in go’aanka cidda garoonka geli karta uu yahay mid isaga u yaalla.

“Waxyaabihii aad hore u soo qabatay kuma siinayaan xuquuq ka badan ciyaartoyda kale. Aad ayaan u ixtiraamayaa wax kasta oo aad ku guuleysatay intii aad ku jirtay xirfaddaada, balse aniga ayaa go’aaminaya cidda ciyaaraysa.

”Ronaldo ayaa muddo sannado ah ahaa xiddiga ugu muhiimsan xulka Portugal, balse da’diisa sii kordhaysa ayaa hadda saamayn ku yeelanaysa doorkiisa iyo waqtiga uu garoonka ku qaadanayo.

Arrintan ayaa sidoo kale dib u soo celinaysa xusuusta khilaafkii hore ee Ronaldo iyo tababarihii xulka Portugal, iyadoo markan ay xaaladdu cirka isku shareertay kadib go’aanka Jorge Jesus ee ah in kabtanka Portugal uu markale keydka fariisto.

Ka bixitaanka Cristiano Ronaldo ee xerada Portugal ayaa xaalad cusub ka abuuray xulka, xilli uu Jorge Jesus isku dayayo inuu caddeeyo in magaca iyo taariikhda ciyaaryahan aysan ka sarreyn karin go’aanka tababaraha.

Dhanka kale, Ronaldo oo muddo dheer ahaa hoggaamiyaha iyo wejiga ugu caansan xulka ayaa muujiyay inuusan ku qanacsanayn doorka cusub ee loo qorsheeyay.

Hadda su’aashu waxay tahay halka uu khilaafkani ku dambayn doono: Ronaldo ma aqbali doonaa doorka cusub ee Jorge Jesus, mise bixitaankiisa ayaa noqon doona bilowga khilaaf sii weynaan kara oo saamayn ku yeesha mustaqbalkiisa xulka Portugal? Jawaabta arrintaas ayaa laga yaabaa inay soo baxdo marka Ronaldo uu ballanqaaday inuu dadka reer Portugal la wadaago waxa dhab ahaan dhacay.