Fabián Ruiz oo Ballon d’Or-ka isku arka: “Anigana maxaa ii diidaya?”
Fabián Ruiz ayaa si toos ah uga hadlay rajadiisa ku aaddan ku guuleysiga Ballon d’Or-ka 2026, isagoo aaminsan in waxqabadkiisa iyo koobabkii uu xilli ciyaareedkan qaaday ay siinayaan sabab uu ugu riyoodo abaalmarinta shaqsiga ah ee ugu weyn kubadda cagta.
Xiddiga PSG iyo xulka Spain ayaa sheegay in marka la eego guulaha kooxeed uu ka mid yahay ciyaartoyda ugu koobabka badan, isagoo door muhiim ah ku lahaa PSG iyo xulka qaranka Spain. Wuxuu sidoo kale tilmaamay in uu aad ugu faraxsan yahay in magaciisa lala xiriiriyo Ballon d’Or-ka.
Ruiz wuxuu xusay in PSG uu kula guuleystay Champions League, halka Spain uu kula qaaday Koobka Adduunka, taas oo ka dhigaysa xilli ciyaareed aad u weyn oo dhinaca koobabka ah. Isagoo ka hadlayay fursaddiisa, wuxuu yiri: “Maxaa loo riyoon waayay inaan ku guuleysto?”
Ciyaaryahanka khadka dhexe ayaa sidoo kale sheegay in Ballon d’Or-ku uusan ahayn abaalmarin ay weeraryahannadu oo keliya u tartamaan, isagoo tusaale u soo qaatay ciyaartoy khad dhexe ah sida Luka Modrić iyo Rodri oo hore ugu guuleystay.
Hadallada Ruiz ayaa kusoo beegmaya xilli tartanka Ballon d’Or 2026 uu si weyn u kulul yahay, iyadoo 30 ciyaaryahan ay u taagan yihiin abaalmarinta. Ruiz ayaa hadda doonaya inuu ka mid noqdo ciyaartoyda ugu sarreysa codadka, isaga oo ku dooday in koobabkiisa iyo doorkiisa kooxaha ay yihiin qayb muhiim ah oo ka mid ah doodda.
