Harry Kane oo Hal Gool u Jira Taariikh Cusub
Harry Kane ayaa qarka u saaran inuu sameeyo taariikh cusub oo Bundesliga ah, kaddib markii xiddiga Bayern Munich uu gaaray 99 gool oo horyaalka Jarmalka ah, isagoo 97 kulan oo keliya ku gaaray tiradaas. Hal gool oo keliya ayaa hadda ka xiga inuu gaaro 100 gool, waxaana indhaha lagu hayaa kulankiisa xiga ee Bundesliga.
Kane ayaa 99-ka gool ku gaaray kaddib markii uu goolka guusha u dhaliyay Bayern Munich kulankii ay 2–1 kaga adkaadeen Elversberg. Goolkaas ayaa sidoo kale ka dhigay Kane ciyaaryahankii ugu dhaqsaha badnaa taariikhda Bayern ee gaaray 150 gool dhammaan tartamada, isagoo ku sameeyay 153 kulan.
Waxa xusid mudan in Kane uu fursad u haysto inuu 100-ka gool ku gaaro kulan aad u yar marka loo eego rikoorkii hore. Bundesliga ayaa sheegtay in Dieter Müller uu 100 gool ku gaaray 129 kulan, taasoo ka dhigan in Kane uu rikoorkaas jebin karo haddii uu goolka 100-aad ku dhaliyo kulankiisa 98-aad.
Kane ayaa sidoo kale muujiyay inuusan ka walwalin labadii kulan ee ugu horreeyay xilli ciyaareedkan ee uusan gool dhalin. Kadib guushii Elversberg, wuxuu sheegay in kubbadda cagta mararka qaar ay u baahan tahay dulqaad, isagoo ku faraxsan inuu ugu dambeyn gool dhaliyay isla markaana kooxdiisa ka caawiyay saddexda dhibcood.
Hadda su’aasha weyn ayaa ah: Harry Kane ma gaari doonaa 100-ka gool kulankiisa xiga ee Bundesliga? Bayern Munich ayaa wajihi doonta Union Berlin, waxaana kulankaas Kane uu haystaa fursad uu ku dhigo magaciisa rikoor kale oo taariikhi ah.
