Todd Boehly oo ka baxay maamulka Chelsea: Clearlake Capital oo la wareegtay kooxda.

Mulkiilaha Chelsea, Todd Boehly, ayaa la sheegay inuu ka baxay maamulka kooxda, kadib markii ay soo baxeen warar sheegaya in shirkadda Clearlake Capital ay si buuxda ula wareegtay maamulka kooxda reer London.

Isbeddelkan ayaa dib u soo celinaya doodda ku saabsan jihada Chelsea iyo waxa maamulka cusub uu ku soo kordhin karo kooxda, oo tan iyo markii uu ka baxay Roman Abramovich aan weli ku laaban heerarkii guulaha ee ay gaartay xilligii milkiyaddiisa.

Chelsea ayaa horumar weyn sameysay intii uu kooxda maamulayay ganacsadaha Ruushka ah ee Roman Abramovich, kaas oo kooxda la wareegay sanadkii 2003.

Intii uu xilka hayay, Chelsea waxay noqotay mid ka mid ah kooxaha ugu guulaha badan kubadda cagta Yurub iyo Ingiriiska.Xilligii Abramovich, Chelsea waxay ku guuleysatay 5 Premier League, 2 Champions League, iyo koobab kale oo waaweyn oo heer qaran iyo heer caalami ah. Guulahaas ayaa kooxda ka dhigay awood joogto ah oo ka dhex muuqata kubadda cagta Yurub.

Si kastaba ha ahaatee, Abramovich ayaa Chelsea iibiyay sanadkii 2022, kaddib markii dowladda Ingiriisku cunaqabateyn ku soo rogtay sababo la xiriira xiriirka uu la lahaa dowladda Ruushka, xilli uu Ruushku duullaan milatari ku qaaday Ukraine.

Chelsea waxaa markaas la wareegay isbahaysi uu hoggaaminayay Todd Boehly, iyadoo shirkadda Clearlake Capital ay noqotay saamileyda ugu badan ee kooxda waqtigaas.

Tan iyo markii uu maamulka cusub la wareegay, Chelsea waxay sameysay isbeddello waaweyn oo dhinaca maamulka, ciyaartoyda iyo tababarrada ah, iyadoo lacag badan lagu maalgeliyay suuqa kala iibsiga. Hase yeeshee, natiijooyinka garoonka ayaan weli gaarin heerkii joogtada ahaa ee lagu yaqaanay Chelsea xilligii Abramovich.

Wararka hadda soo baxaya ayaa sheegaya in Todd Boehly uu ka baxay maamulka kooxda, iyadoo Clearlake Capital ay tahay mid si buuxda u leh gacan-ku-haynta maamulka Chelsea.

Maxaa laga filan karaa maamulka cusub?

Isbeddelkan ayaa keenaya su’aalo badan oo ku saabsan mustaqbalka Chelsea.

Maamulka Clearlake Capital waxaa horyaalla howlo waaweyn, gaar ahaan sidii ay kooxda ugu soo celin lahaayeen tartanka joogtada ah ee loogu jiro Premier League iyo Champions League.

Chelsea waxay tan iyo bixitaankii Abramovich ku guuleysatay FIFA Club World Cup iyo Uefa conference league, balse kooxda ayaa wajahday isbeddello badan oo dhinaca tababarrada, ciyaartoyda iyo maamulka ah. Taas ayaa keentay in taageerayaal badan ay is weydiiyaan haddii isbeddelka maamulka uu noqon doono bilow cusub oo Chelsea u horseeda xilli guulo badan leh.

Ugu dambeyntii, Bixitaanka Todd Boehly ayaa sii xooginaya doorka Clearlake Capital taas oo soo celin karta maqaamkii kooxdu leheyd 20kii sano ee la soo dhaafay. Su’aasha ugu weyn ayaa ah in maamulka cusub uu heli doono qorshe cad oo isku dheelli tira maalgelinta, dhismaha kooxda iyo natiijooyinka garoonka.

Chelsea waxay hadda taagan tahay meel muhiim ah: ma awoodi doontaa maamulka Clearlake Capital inuu dib u dhiso kooxda oo uu u horseedo xilligii guulaha waaweynaa, mise isbeddelkan ayaa noqon doona marxalad kale oo ka mid ah dib-u-dhiska kooxda?