Real Madrid iyo Barcelona oo ku dagaallamaya saxiixa da’yarka JJ Gabriel
Real Madrid iyo Barcelona ayaa ku loollamaya saxiixa JJ Gabriel, oo ah 15 jirka Manchester United ee si weyn looga hadal hayo kubadda cagta Yurub. Da’yarkan ayaa mustaqbalkiisa Old Trafford shaki geliyay, iyadoo kooxaha waaweyn ee qaaradda ay doonayaan inay ka faa’iideystaan xaaladdiisa.Wararka kasoo baxaya Spain ayaa sheegaya in Real Madrid ay miiska saartay dalab dhaqaale oo ka sarreeya kan Barcelona.
Madrid ayaa dooneysa inay si xooggan uga shaqeyso sidii ay gacanta ugu dhigi lahayd ciyaaryahanka, kaas oo loo arko mid ka mid ah da’yarta sida weyn loo qiimeeyo.Dhanka kale, Barcelona ma aysan ka harin tartanka. Kooxda reer Catalonia ayaa isku dayaysa inay Gabriel ku qanciso qorshaheeda ciyaareed, iyadoo la sheegay in Barça ay u soo bandhigeyso waddo uu si dhaqso ah ugu dhowaan karo kooxda koowaad.
Gabriel iyo qoyskiisa ayaa sidoo kale booqday Barcelona, taasoo sii xoojisay wararka ku saabsan mustaqbalkiisa.Gabriel wuxuu Manchester United u gudbiyay codsi uu ku doonayo inuu ka tago kooxda, iyadoo mustaqbalkiisa hadda uu noqday arrin si weyn looga hadal hayo. Real Madrid, Barcelona, PSG iyo Bayern Munich ayaa dhammaantood lala xiriiriyay ciyaaryahanka, balse wararka ugu dambeeyay waxay si gaar ah u muujinayaan tartanka Madrid iyo Barcelona.
Go’aanka ugu dambeeya ee da’yarka weli lama xaqiijin, waxaana wararku sheegayaan in doorashada kooxdiisa cusub ay soo dhowaaneyso. Sidaas darteed, loollanka Real Madrid iyo Barcelona ee saxiixiisa ayaa noqon kara mid ka mid ah sheekooyinka ugu xiisaha badan suuqa da’yarta Yurub maalmahan.
