Eriksen oo ku dhow inuu isaga fariisto ciyaaraha kadib markii uu ka tagay Wolfsburg!
Christian Eriksen ayaa si lama filaan ah uga tagay Wolfsburg, iyadoo labada dhinac ay si wadajir ah u go’aansadeen in la soo afjaro heshiiskii ciyaaryahanka, kaasoo markii hore ku ekaa 30-ka Juun 2027. Go’aankan ayaa Eriksen ka dhigay ciyaaryahan xor ah, iyadoo mustaqbalkiisa kubadda cagta uu weli yahay mid aan la hubin.
34-jirka reer Denmark ayaa sheegay in xilligan ay muhiim u tahay inuu qoyskiisa u dhowaado gudaha Denmark. Wolfsburg ayaa sidoo kale sheegtay in go’aanka mustaqbalkiisa loo daayay Eriksen, iyadoo kooxda ay aqbashay codsigiisa ah in heshiiska la soo afjaro.Eriksen ayaa xilli ciyaareedkiisii Wolfsburg sameeyay 34 kulan, isagoo dhaliyay saddex gool isla markaana bixiyay 10 caawin.
Si kastaba, xaaladdiisa ayaa is beddeshay kadib dhacdadii caafimaad ee uu la kulmay intii uu Denmark u ciyaarayay bishii Juun, taasoo keentay inuu muddo ku qaato soo kabasho iyo barnaamij tababar oo gaar ah.Inkasta oo hadal-heyn xooggan ay soo baxday oo ku saabsan inuu ka fariisan karo kubadda cagta, Eriksen weli ma uusan shaacin inuu si rasmi ah u fariistay. AS ayaa xustay in mustaqbalkiisa uu weli furan yahay, isla markaana ay suurtagal tahay inuu raadsado koox cusub, gaar ahaan Denmark.
Sidaas darteed, tallaabada uu qaaday Eriksen waxay albaabka u furtay laba waddo: inuu sii wato xirfaddiisa isagoo raadinaya koox cusub ama uu go’aan ka gaaro inuu soo afjaro waayihiisa ciyaareed. Hadda waxa la sugayaa go’aanka ugu dambeeya ee xiddigii hore ee Tottenham, Inter Milan iyo Manchester United.
